Загадкі-амонімы ад Кандрата Крапівы

Бабка

Розных бабак шмат на свеце.

Тры з іх добра я прымеціў:

Біў адну я малатком,

Еў другую з малаком, а трэцяя бабка - 

Карэньчык ды шапка.

Галава

Кожны з нас,

Хто жыве,

Мае па галаве.

А бывала ж яна

І на горад адна.

Бык

Падышоў я да ракі,

Дзе пасуцца два быкі.

Каля ног вада бушуе,

Бык стаіць - нібы не чуе.

Узвалі хоць сотню тон,

Не скранецца з месца ён.

Як зрабілі паварот,

Стала ўсё наадварот:

Бык бушуе малады

Каля лужыны вады.

А што гэта за быкі,

Разгадайце, сябрукі.

Баба

Хоць на словах і радня,

Баба бабе не раўня,

Між сабой яны не ладзяць:

Адна б'е, другая гладзіць.

Тая з маху як ударыць -

Аж зямля калоціцца;

Гэта варыць, гаспадарыць,

Аб усіх клапоціцца.

Адгадкі глядзіце далей

Бабка 1 - маленькае кавадла
Бабка 2 - пірог або страва з бульбы
Бабка 3 - грыб (падбярозавік)

Галава 1 - галава чалавека
Галава 2 - кіраўнік горада

Бык1 - апора маста
Бык 2 - хатняя жывёла

Баба1 - прылада для забівання сваяў
Баба2 - бабуля