Загадкі-амонімы ад У. Мазго 2

Скажу

Адзін раз слова - 

Мне бачыцца

Аснова,

Скажу другі -

Як блазан

Лятаў на ім

Мюнхаўзен.

Папрасіў я 

Плод у краме,

А даюць

Каштоўны камень,

Не мая

У тым віна,

Калі назва ў іх

Адна.

Паверхня вод

Без хвалявання

Падкажа

Спосаб вышывання.

Пасажырскую павозку

І каманду танка ў войску

З даўніх пор

Абавязкова

Называюць

Гэтым словам.

Тоькі выцягнем

Кружок

Металічны

З гоманам -

Дым вісіць,

Як кажушок,

Угары

Над комінам.

Бо гарыць

Агонь у печы

І ўжо варыцца,

Дарэчы,

Хутка страва

Рыбная,

Вельмі каларыйная.

Падарунак сябруку

Служыць

Назвай бальшаку.

Адгадкі глядзіце далей.

Загадкі-амонімы ад У. Мазго

Чым можна

Гальштук завязаць

І хуткасць суднаў

Вымяраць?

Што за кольца

З хлебнай крамы

Я нясу дамоў

Да мамы

І кручу над галавою,

Быццам кола рулявое?

На адной

Здавён іграюць,

Другой

Зерне ачышчаюць.

Бок самалёта

Ці баркаса

І разнавіднасць

У алмаза.

Без падказкі

За мінутку

Назавіце

Від абутку - 

І міне адразу мель

Невялікі карабель.

Мясціна гэтакая, дзе

Вятрам адкрыты бок,

І для бяспекі на вадзе

Сігнальны паплавок.

Маша

Кашу спажывае,

Ціха

Птушачка спявае.

Што за птушка,

Што за каша -

Слова гэтае

Падкажа.

Адгадкі глядзіце далей.

Загадкi пра святы

Летась кароль ехаў, а сёлета сляды значны.

Як цэлы год ждалi, то мясам прымалi, а як адпраўлялi, то цыбулькай частавалi.

Сем мiль масту, а ў канцы цвет, ды на ўвесь свет.

Пад дубам райскiм, пад крылом царскiм два арлы арлуюць, адно яйцо балуюць.

Адгадкі глядзіце далей.

Загадкі-амонімы ад Кандрата Крапівы

Бабка

Розных бабак шмат на свеце.

Тры з іх добра я прымеціў:

Біў адну я малатком,

Еў другую з малаком, а трэцяя бабка - 

Карэньчык ды шапка.

Галава

Кожны з нас,

Хто жыве,

Мае па галаве.

А бывала ж яна

І на горад адна.

Бык

Падышоў я да ракі,

Дзе пасуцца два быкі.

Каля ног вада бушуе,

Бык стаіць - нібы не чуе.

Узвалі хоць сотню тон,

Не скранецца з месца ён.

Як зрабілі паварот,

Стала ўсё наадварот:

Бык бушуе малады

Каля лужыны вады.

А што гэта за быкі,

Разгадайце, сябрукі.

Баба

Хоць на словах і радня,

Баба бабе не раўня,

Між сабой яны не ладзяць:

Адна б'е, другая гладзіць.

Тая з маху як ударыць -

Аж зямля калоціцца;

Гэта варыць, гаспадарыць,

Аб усіх клапоціцца.

Адгадкі глядзіце далей

Крыжаванка "Садавіна і гародніна"

Загадкі-задачы

1. Ляцела сарока, за ёю сарок. Колькі ляцела?

2. Як і цапу, так і лапу, выбілі капу без сараку, без петаку, без пятнаццаці снапоў. Колькі яны змалацілі?

3. Стаяла хата, а ў хаце было сем акошак, а на кожным акошку сядзела сем кошак, а ў кожнай кошкі было па сем кацянят. Колькі ва ўсіх іх было ног?

4. Дзве дачкі, дзве матулі і бабулька з унучкай. Колькі ўсіх?

5. Ішоў брат з сястрою і муж з жаною, знайшлі тры сыры. Як яны падзялілі?

6. Запалілі дзве свечкі, адна патухла. Колькі засталося?

7. Несла гаспадыня ў кошыку 10 яек, а дно ўпала. Колькі засталося?

8. Сядзяць кошкі, супраць кожнай кошкі па тры. Колькі было разам?

Адгадкі глядзіце далей

5 загадак пра стравы ад Алены Церашковай

Закуска
У свінні яго немала.
Я вазьму сабе кавалак.
Каб закуску згатаваць,
Засталося мне дадаць
Палавінку слова ТАТА –
І гатовая…

Першая страва
Я ў свой рондаль пакладу
Лес хваёвы. І пайду
На градзе нарэжу шчаўя
І дзве літаркі прыбаўлю.
Ці не цуд? Анягож!
Налівай чырвоны …

Другая страва (гарнір)
Мы сярэдзінку цыбулькі
і пачатак ад бабулькі
Мылі, потым абіралі,
На скрылёчкі наразалі,
На патэльню высыпалі
Ды алеем палівалі.
Вы нашу страву адгадалі?

Другая страва
Конь мой спрытны – самакат -
Даў мне свой апошні склад.
А надалей пойдзе ў нас
Самы лепшы ў годзе час.
Солім, перчым, смажым гэта –
Атрымалася …

Трэцяя страва
Што я толькі ні рабіў,
А яго я не здабыў.
Браў бялюткае палена
І ламаў цераз калена…
Абцярэбліваў галінкі
Ў выціскальную машынку…
Што ж я так хацеў зрабіць?
Як я мусіў паступіць?

Адгадкі глядзіце далей

Загадкі пра жывёл і птушак ад Ніла Гілевіча

Шустранькі,

Маленькі,

Сам у шэрай світцы

Шукае канапелькі,

Каб трохі пажывіцца.

Домік,

Поўненькі дабра,

Доўга

Быў без жыхара,

А жыхар як паявіўся -

Домік

Тут жа разваліўся.

Лясной сцяжынкай, 

Дзе густыя шаты,

Працаўнічок

Спяшаецца дахаты,

Яго амаль і не відаць,

Малога,

А цягне - болей

За сябе самога.

Лупавокая Матруна -

Вечна мокрая макруня,

Ды пакуль не стане пець -

Яшчэ можна і сцярпець,

А як песню завядзе -

Няма радачкі нідзе!

Хоць ты вушы затыкай

Ці за тры вярсты ўцякай.

Удзень адпачывае,

Забіўшыся дзе ў хвойнік,

А ноччу выгукае,

Нібы які разбойнік, -

Папаляваць ён любіць,

Калі ўсім іншым спіцца,

Яго баяцца людзі,

А ён людзей баіцца.

Чатыры хадуны - 

Каб чабаткі таптаць,

Чатыры цвыркуны -

Каб дзецям радасці даць,

А вілы прад сабою -

Усім звярам на страх.

А ззаду - мухабой:

Хлясь - мах!

Хлясь - мах!

Хлясь - мах!

Адгадкі глядзіце далей.