Загадкі ад Ніла Гілевіча

Сам без ног,

Малы,

Пузаты,

А такі скакун заўзяты!

Толькі стукні добра ў бок -

Як адразу пойдзе ўскок.

Яго скокі дзеці любяць,

Ды нагамі часам лупяць,

А яму - бы гэта й трэба:

Узлятае аж пад неба.

На каменне упадзе -

Хоць бы знак застаўся дзе!

Не паб'е

Сабе

Бакі.

Хто ж ён гэткі?

Хто такі?

***

Хвост увесь на двары.

Толькі нос у нары,

І да той да пары,

Пакуль нос у нары -

Ў дом не зможа зайсці

Ні малы, ні стары.

***

Я трымаў спачатку клін,

Разгарнуў - зрабіўся блін.

Хлынуў дождж, цурчыць вада -

А мне з блінам не бяда.

***

Туды рог,

Сюды рог,

Пасярод - нібы парог,

А сама напхана пухам

І ў мяне

Ляжыць пад вухам.

***

І дзень ідзе,

І ноч - ідзе,

І трэці дзень, і сёмы.

Сваёй хадзе

Падлік вядзе,

Не ведаючы стомы.
А не стамляецца таму

(Хоць гулка сэрца б'ецца),

Што колькі б год ні йсці яму -

Ён з месца не кранецца.

Адгадкі глядзіце далей.


Адгадкі.
Мяч, замок, парасон, падушка, гадзіннік