Зямля і вада

Што нас корміць, а есці не просіць?
(зямля)

Матчыну скрыню не паднімеш, даччыну трубку не скатаеш, братнінага коніка не спаймаеш.
(зямля, дарога, вецер)

Дзяжа чорная, а века белае.
(снег на зямлі)

Па мне паўгода ходзяць, паўгода ездзяць.
(балота)

Без ног бяжыць, без вачэй глядзіць.
(вада)

Вясной конік іграе, а летам адпачывае.
(вада)

Карова бяжыць, скура ляжыць.
(вада і лёд)

- Куды ідзеш, крывая крывуліца? - А чаго стаіш, стрыжаная патыліца?
(рэчка і сенажаць)

Два браты ў ваду глядзяцца, а разам не сыходзяцца.
(берагі ракі)

Кабыла бяжыць, аглоблі ляжаць.
(рака і берагі)

Адно бяжыць, другое ляжыць, а каб усталі, то да неба б дасталі.
(рака і дарога)