Загадкі-задачы ад Уладзіміра Мацвеенкі

Ясік

На рыбалцы быў,

Трошкі

Рыбы налавіў.

Першым

Трапіў на кручок

Невялікі шчупачок.

Ды праз час кароткі

Па чарзе тры плоткі.

А затым на глыбіні

Клюнулі два акуні.

І апошнім быў карась.

Колькі ўсіх прынёс нам Ясь?

Бачылі, вы, дзеткі, Жэню?

Жэня з'ела ягад жменю -

Дзве адразу, тры і пяць,

Потым разам дваццаць пяць.

Гэтулькі ўмясціла жменя.

Колькі ягад з'ела Жэня?

Мікола і Толя

Статак гналі ў поле:

Шэсць авечак, пяць бычкоў

І чатырнаццаць кароў.

Колькі ўсіх жывёл

У поле

Выгналі

Мікола й Толя?

Днём вавёрка

Скок з сучка

І знайшла баравічка.

Потым каля сцежкі

Хоп! - дзве сыраежкі.

А пасля лісічкі, 

Нібы тры сястрычкі.

Колькі ўсіх грыбкоў было

Перанесена ў дупло?

Адгадкі глядзіце далей


Сем
Трыццаць пяць
Дваццаць пяць
Шэсць